Spanjë-Angli do të jetë finalja e Euro 2024. Për Spanjën kjo është një histori që përsëritet në vite. Anglia ka qenë vetëm një herë në finale, atë të 2021, por e pafuqishme përballë Italisë që fitoi me 11 metërsha.
Ndërsa spanjollët janë skuadra më e suksesshme duke e fituar kampionatin europian 3 herë, ashtu sikurse edhe Gjermania. Por “La Roja” mban rekordin se është e vetmja kombëtare që e ka fituar europianin dy herë radhazi.
Në edicionin e 17 të europianit dy skuadrat arritën deri në ndeshjen e fundit në dy rrugë të ndryshme.
Spanjollët i fituan të tre ndeshjet e grupit duke u kualifikuar me pikë të plota në fazën me eliminim direkt. Ndërsa Anglia, pas fitores së parë me Serbinë mori me vështirësi dy barazime me Danimarkën dhe Slloveninë.
Në të 16 e finales, Anglia fitoi me Sllovakinë me golin e barazimit nga Jude Bellingham në minutat shtesë të kohës së rregullt dhe më pas me avantazhin e Harry Kane sapo nisën shtesat 15minutëshe.
Ndërsa Spanja fitoi thellë me Gjeorgjinë entuziaste dhe energjike.
Ekipi i Southgate pati fat në çerekfinale ndaj Zvicrës. Pas një barazimi në kohën e rregullt dhe shtesa, në goditjen e 11-metërshave zviceranët u treguan të pasaktë.
Nga ana tjetër edhe Spanjën e deshi fati, arbitri apo ndonjë tjetër forcë madhore. Ndaj Gjermanisë fituan 2-1, por ndalja e topit me dorë nga Cucurella, edhe pse mund të ishte gol i sigurtë as nuk u mor në konsideratë nga VAR.
Në gjysmëfinale u pa fytyra e vërtetë e të dy skuadrave. Në fakt Spanja pati të njëjtin imazh, të njëjtën paraqitje dhe impenjim duke asgjesuar Francën në pak minuta, duke u bërë kombëtarja e parë që fiton 6 ndeshje radhazi në një ngjarje madhore futbollistike.
Ndërsa Anglia shfaqi më të mirët e saj duke kaluar Holandën, me një gol të dytë të shënuar në minutën e fundit.
Finalja e Berlinit do të jetë përballja e 28 mes Spanjës dhe Anglisë. Në 27 të mëparshmet 10 i ka fituar Spanja, 3 barazime dhe 14 herë ka fituar Anglia. Fakt është që 19 ndeshje kanë qenë miqësore.
Në Berlin vendoset supremacia e futbollit Europian. Cila do të jetë skuadra që do të mbajë për 4 vite kurorën e kampiones? Duhet të presim të dielën në orën 21:00, në ekranin e Tv Klan.
