17 prilli njihet si Dita Botërore e Hemofilisë, çrregullimi i koagulimit, ose e thënë në gjuhën popullore, mpiksje e gjakut. Teksa cilësohet si sëmundje e rrallë, 1 në 10 mijë persona lindin me Hemofilinë A dhe 1 në 50 mijë me Hemofilinë B.
Mjekja Adela Perolla tregon se kjo sëmundje është e trashëgueshme, ndërsa nuk përjashton dhe rastet kur ajo shkon deri në fatalitet.
“Hemofilia është një sëmundje gjaku e trashëgueshme e lidhur me kromozomin X. Kemi të bëjmë me mungesë të faktorit 8 dhe 9 te këta pacientë. Tendenca për hemorragjitë mund të dërgojë deri në rrezikun për jetën te këta pacientë, e rëndësishme është që të merret faktori që mungon”, tha mjekja.
Hemofilia prek më së tepërmi meshkujt se sa femrat.
“Duke qenë një sëmundje që ka të bëjë me një mutacion gjenetik, që lidhet me kromozomin X, ajo është më e përhapur te femrat se sa te meshkujt. Mesazhi i rëndësishëm është që të avokojnë më tepër për të drejtat e tyre, të arrijmë synimin për trajtimin në shtëpi, kjo është sfida”, theksoi Perolla.
Personat e prekur me hemofili sipas ekspertëve duhet të tregojnë kujdes të shtuar në trajtimin e sëmundjes, ndërsa janë të kushtëzuar të heqin dorë nga disa sporte aktive, si futbolli, volejbolli, alpinizmi e të tjera.
