Demokratët dhe republikanët kanë rënë dakord në parim për të rritur tavanin e borxhit të SHBA dhe për të shmangur një falimentim pas javësh negociatash mes presidentit Joe Biden dhe kryetarit të Dhomës së Përfaqësuesve Kevin McCarthy.
Edhe pse është rënë dakord në parim, marrëveshja duhet të miratohet nga një Kongres i ndarë amerikan.
Presidenti Joe Biden e përshkroi marrëveshjen si një “kompromis”, ndërsa kryetari i Dhomës së Përfaqësuesve Kevin McCarthy tha se “ka reduktime historike në shpenzime”, raporton BBC.
Në një konferencë të shkurtër për shtyp të shtunën vonë, zoti McCarthy tha se kishte folur me Presidentin Biden në telefon dy herë gjatë ditës.
“Pas javësh negociatash, ne kemi arritur në një marrëveshje në parim. Kemi ende shumë punë për të bërë, por besoj se kjo është një marrëveshje në parim që është e denjë për popullin amerikan. Ka reduktime historike në shpenzime, reforma konsekuente që do t’i nxjerrin njerëzit nga varfëria në fuqinë punëtore, frenojnë tejkalimin e qeverisë, nuk ka taksa të reja, nuk ka programe të reja qeveritare, ka shumë më tepër brenda projektligjit,” tha McCarthy.
Edhe presidenti Biden tha se “Marrëveshja përfaqëson një kompromis, që do të thotë se jo të gjithë marrin atë që duan. Kjo është përgjegjësia e qeverisjes. Kjo marrëveshje është një lajm i mirë për popullin amerikan, sepse parandalon atë që mund të kishte qenë një falimentim katastrofik dhe do të kishte çuar në një recesion ekonomik, llogaritë e pensioneve të shkatërruara dhe miliona vende pune të humbura”.
Si Biden edhe McCarthy do të duhet të bindin anëtarët e Kongresit në partitë e tyre se marrëveshja është e mirë përpara votimit këtë javë.
Thesari i SHBA-së paralajmëroi më herët se vendit do t’i mbaronin paratë për të paguar faturat e tij, gjë që do të përmbyste ekonominë amerikane dhe do të prishte tregjet globale.
SHBA-ja duhet të marrë hua për të financuar qeverinë, sepse shpenzon më shumë se sa mbledh taksat.
Republikanët kanë kërkuar shkurtime të shpenzimeve në fusha të tilla si arsimi dhe programe të tjera sociale në këmbim të rritjes së kufirit të borxhit prej 31.4 trilion dollarësh.
/rtsh.al/
