SHBA- Ish-presidenti Trump urdhërohet të dëshmojë në komitetin e 6 janarit. Paneli i Kongresit që heton trazirat e vitit të kaluar në Kapitol ka lëshuar një thirrje ligjore që urdhëron ish-presidentin Donald Trump të dëshmojë para ligjvënësve. Duke iu drejtuar atij, dokumenti thotë: Ju ishit në qendër të përpjekjes së parë dhe të vetme të çdo presidenti amerikan për të përmbysur zgjedhjet. Ju e dinit se ky aktivitet ishte i paligjshëm dhe antikushtetues.
Një avokat i Trump akuzoi ligjvënësit në komitet për “shkelje të normave”. Ish-presidenti e ka kritikuar hetimin si një hile të krijuar për të larguar votuesit nga “katastrofa” e qeverisjes demokratike me zgjedhjet afatmesme në SHBA që priten muajin e ardhshëm.
Trump mund të përballet me akuza penale nëse nuk zbaton thirrjen. Ai ka kohë deri më 4 nëntor për t’i paraqitur dokumentet komitetit të 6 janarit dhe duhet të paraqitet për dëshminë e depozitimit më 14 nëntor ose rreth kësaj date. Nëse zoti Trump refuzon të dëshmojë në Kongres ose të dorëzojë materialin e kërkuar, komiteti mund t’ia referojë çështjen Departamentit të Drejtësisë duke shkaktuar potencialisht procedime penale.
Letërthirrja u lëshua vetëm disa orë pasi ish-strategu i Trump, Steve Bannon u gjobit me 6,500 dollarë dhe u dënua me katër muaj burg për shpërfillje të Kongresit. Ai u dënua pasi refuzoi të jepte dëshmi ose dokumente në komision. Një ndihmës tjetër i Trump, Peter Navarro, do të dalë në gjyq për shpërfillje të Kongresit muajin e ardhshëm pasi refuzoi të bashkëpunojë me një thirrje të ngjashme.
Komiteti i përzgjedhur po shqyrton sulmin e dhunshëm të mbështetësve të Trump në ndërtesën e Kapitolit të SHBA më 6 janar 2021. Shtatë demokratët dhe dy republikanët e panelit votuan njëzëri javën e kaluar për të detyruar republikanin të dëshmojë për rolin e tij në trazira. Ligjvënësit thonë se Trump u kërkoi mbështetësve të tij të refuzonin rezultatin e zgjedhjeve presidenciale të vitit 2020, duke i shtyrë ata të sulmojnë sallat e Kongresit në një përpjekje për të parandaluar që Joe Biden të certifikohej si fitues.
