Presidenti Joe Biden doli pozitiv për COVID-19 të enjten dhe po izolohet me “simptoma shumë të lehta”, tha Shtëpia e Bardhë, ndërsa variantet e reja të virusit shumë ngjitës po sfidojnë përpjekjet e botës për t’u rikthyer në normalitet pas dy vjet e gjysmë pandemie.
Sekretarja e shtypit e Shtëpisë së Bardhë, Karine Jean-Pierre tha se Biden kishte filluar të merrte Paxlovid, një ilaç antiviral i krijuar për të zvogëluar ashpërsinë e sëmundjes.
Biden është i izoluar në zonën familjare të Shtëpisë së Bardhë dhe “vazhdon të kryejë plotësisht të gjitha detyrat e tij”, tha ajo, citon noa.al.
Mjeku i Biden, Dr. Kevin O’Connor, tha në një njoftim se Biden kishte një rrjedhje hundësh dhe “lodhje, me një kollë të thatë herë pas here, e cila filloi dje në mbrëmje”.
Vetë Biden tha në një video të postuar në Twitter: “Unë i vlerësoj vërtet shqetësimet tuaja. Por jam duke u bërë mirë dhe duke bërë shumë punë.”
Biden, 79 vjeç, është vaksinuar plotësisht, pasi mori dy doza të vaksinës së koronavirusit Pfizer pak para marrjes së detyrës, një injeksion të parë përforcues në shtator 2021 dhe një dozë shtesë më 30 mars.
Presidenti do të izolohet për pesë ditë dhe mund të kthehet në aktivitetet e tij të zakonshme pas një testi negativ, u tha gazetarëve në një konferencë shtypi, koordinatori i Shtëpisë së Bardhë për COVID-19, Dr. Ashish Jha. /noa.al
