Një efektiv ka mbetur i lënduar në veri të Kosovës, ku vijojnë protestat në komunat me shumicë serbe. Në një njoftim, për mediat, Policia e Kosovës bën me dije se protestuesit kanë hedhur gurë në drejtim të tri automjeteve të Policisë. Për pasojë ka mbetur i lënduar një efektiv, i cili është dërguar në spital dhe po merr ndihmën e nevojshme mjekësore.
“Policia e Kosovës në bashkëpunim dhe koordinim me institucionet e sigurisë, kanë vazhduar angazhimet në ofrimin e sigurisë dhe mbarëvajtjen e protestave të cilat janë mbajtur edhe sot pranë komunave Leposaviq, Zubin Potok dhe Zveçan. Fillimisht protesta ishte e qetë, por në orët e pasdites në intervale të ndryshme kohore disa persona të dyshuar kanë hedhur gurë në drejtim të tri automjeteve të Policisë së Kosovës, ku dy prej tyre iu janë shkaktuar dëme materiale duke iu thyer xhamat. Si pasojë e sulmeve nga mjetet e forta një zyrtar policorë ka pësuar lëndime”, thuhet në njoftimin e Policisë.
Po ashtu bëhet me dije se gjatë pasdites së kësaj të mërkure janë penguar dhe sulmuar edhe disa gazetarë.
“Gjatë protestës së realizuar sot, disa media/gazetarë janë penguar e sulmuar, si dhe automjetet e tyre ishin vandalizuar nga individ/grupe kriminale. Pengimi i gazetarëve në detyrë cenon të drejtën e shprehjes, informimit dhe lirinë e shtypit. Ne jemi të përkushtuar të hetojmë këto akte kriminale dhe të parandalojmë shfaqjen e dhunës. Njëkohësisht Policia e Kosovës u bën thirrje të gjithë protestuesve që të përmbahen nga dhuna dhe të shprehin mendimet e tyre në mënyrë paqësore”, njofton Policia e Kosovës.
/rtsh.al/
