Balla: Ka vlerësuar se komuniteti i biznesit luan një rol të rëndësishëm në ofertën turistike të Fierit. Prej kohësh ai është i kudo gjendur mes elektoratit të qarkut të Fierit herë duke bashkëbiseduar me njerëzit e herë në krah të të zgjedhurve vendorë në ndjekje të ecurisë së investimeve publike. Nga takimi i kryeministrit Edi Rama, drejtuesi Politik i PS-së për qarkun e Fierit, Taulant Balla tha se, “komuniteti i biznesit luan një rol të rëndësishëm në ofertën turistike të Fierit”. Balla theksoi se qëllimi i këtij takimi është për të sjellë në vëmendje këtë pasuri të madhe që ka kjo zonë, për zhvillimin e një turizmi elitar që nuk e kemi në Shqipëri. Balla vuri në dukje se ky tip turizmi nuk mund të zhvillohet pa mbështetjen e komunitetit të biznesit. “Aeroporti i Vlorës, është një urë lidhëse për Fierin dhe bregdetin e Darzezës dhe të Semanit dhe i gjithë projekti që synojmë të zhvillojmë në të gjithë zonën të ndërlidhur do të jetë i një tipi krejt të veçantë gur, dru dhe gjelbërim që e shndërrojnë zonën në një nga plazhet më të bukura të Adriatikut, që çdo vit kërkohet më shumë dhe kërkon një zhvillim të ri e të qëndrueshëm”, tha Balla.
