CR7 thuhet se ka shpenzuar 18 milionë stërlina për të pasur shtëpinë më të shtrenjtë në Portugali. Ky fakt shton thashethemet për një transferim te Sporting Lisbona në janar, skuadra ku hodhi hapat e parë në futboll.
Pesë herë fituesi i “Topit të Artë” u rikthye në formacionin fillestar të Erik ten Hag në fitoren e “Europa League” ndaj Sheriff-it. Ronaldo shënoi golin e fundit në triumfin 3-0 në “Old Trafford”. Megjithatë, nuk ka gjasa të ruajë vendin e titullarit për ndeshjen e kësaj fundjave në Premier League me West Ham.
Dhe pasi sprova e tij kundër “Spurs”, këtë muaj, e pa të largohet nga ekipi i parë, Ronaldo vazhdon të jetë i lidhur me largimin në janar. Një nga këto destinacione mund të jetë Sporting Lisbona, me ish-klubin e tij mëmë që ëndërron ribashkimin emocionues.
Ronaldo tani i ka hedhur “benzinë zjarrit”, duke spërkatur me para një vilë te re luksoze, vetëm 40 minuta me makinë larg kryeqytetit portugez. CR7 krenohet tashmë me një perandori masive pronash, pasi ka blerë më parë banesën më të shtrenjtë të Lisbonës.
Në fillim të këtij viti u raportua se ai po kërkonte gjithashtu të ngrinte një shtëpi të madhe në vendlindje. “Marca” pretendon se mes blerjes së vilës së mrekullueshme dhe rinovimit të saj, “Ronnie” ka shpenzuar gjithsej 18 milionë stërlina.
Kjo e bën rezidencën, e vendosur në rajonin Cascais dhe që do të jetë gati në fillim të vitit 2023, pronën më të shtrenjtë në vend. E vendosur përgjatë Rivierës Portugeze, në “Quinta da Marinha”, një zonë ekskluzive banimi, shtëpia është afër qyteteve, duke përfshirë Estoril dhe Sintra.
Specifikimet janë gjithashtu shumë mbresëlënëse, me rezidencën me përmasa 2.720 metra katrorë në tri kate. Ekziston edhe një zonë e jashtme prej 544 metrash katrorë, e cila përfshin kopshte të ndryshme dhe një pishinë masive.
Vendimi i Ronaldos për të blerë një pronë kaq luksoze në Portugali lë të kuptohet se ai po konsideron një kthim atje së shpejti. Bosi i Sportingut, Ruben Amorim, konfirmoi këtë javë se do të dëshironte ta kishte Ronaldon në krah. Sidoqoftë, paga 360.000 £ në javë e superyllit luzitan mund të jetë një pengesë.
Amorimi tha: “Nuk e di. Ronaldo është një top-lojtar, një lojtar i Manchester United. Të gjithë te Sporting ëndërrojnë rikthimin e Cristiano-s, kështu që nuk dua të flas për këtë. Ne nuk kemi para për të paguar pagat e tij. Unë mendoj se është i lumtur në Manchester, por nuk po luan, kështu që ky është problemi”.
