Nëse jeni akoma në përgatitje e sipër për ballokumet me shije unike të Elbasanit, kjo është receta origjinale.
Përbërësit:
1 kg miell misri i situr
1 kg sheqer
0.5 kg gjalpë
8 kokrra vezë
Një enë e madhe bakri e pakallajisur ose prej qelqi
Përgatitja
Tretet gjalpi dhe pastaj rrihet me sheqerin e bërë pluhur deri sa të bëhet një masë e bardhë. E mira është që rrahja e masës të bëhet me dorë, sepse fundi i rrahjes ndihet kur të duket se preken fije me dorën që po përzien masën. Shtohen vezët një nga një. Rrihen derisa të bëhet një masë e vetme.
Pastaj hidhet mielli dalëngadalë duke vazhduar përzierjen. Kujdes në hedhjen e miellit, sepse mielli i tepërt i bën të forta ballakumet pas pjekjes. Prandaj, pasi është harxhuar sasia e paracaktuar e miellit, brumi lihet rreth 15 minuta në qetësi pavarësisht se ai mund të duket i qullët. Kjo kohë mjafton që grimcat e miellit të thithin lagështirën e brumit të qullët. Pas kësaj brumit mund t’i shtohet edhe një dorë miell nëse është e nevojshme kur ai mbetet si i qullët.
Pjekja
Pudroset tepsija me miell dhe mbi të vendosen topat e brumit me madhësinë e grushtit të dorës. Pastaj futet tepsija në pjekje për rreth 40 minuta në 170°C deri sa të formojë pak kore (jo të skuqet). Nxirret tepsija dhe lihet të ftohet me qëllim që ballokumet të shkëputen lehtësisht.
Ju bëftë mirë… dhe gëzuar!
