GREQI- Pas Kryeministrit Mitsotakis, ministri i Jashtëm grek, Nikos Dendias, ka përforcuar qëndrimin e qeverisë helene lidhur me çështjen e detit me Shqipërinë. Në një aktivitet për politikën ndërkombëtare, ai theksoi se Greqia do të vazhdojë të mbrojë të drejtat dhe interesat e saj në përputhje me Konventën e Kombeve të Bashkuara për të Drejtën e Detit (UNCLOS).
“Greqia ka shprehur vazhdimisht synimin dhe gatishmërinë e saj për të negociuar marrëveshje të ngjashme me vendet e tjera fqinje në bazë të së drejtës ndërkombëtare. Për këtë qëllim, ne kemi rënë dakord me Shqipërinë që t’i referohet përcaktimit të zonave detare të dy shteteve në Gjykatën Ndërkombëtare të Drejtësisë në Hagë, në përputhje të plotë me dispozitat e UNCLOS”, ka thene Dendias.
Ai theksoi se “vendi ynë ushtroi të drejtën e tij për të shtrirë ujërat e tij territoriale në 12 milje detare në zonën e detit Jon. Dhe rezervon të drejtën për ta ushtruar atë në pjesë të tjera të territorit të saj. Fatkeqësisht, Turqia është i vetmi vend në rajon që refuzon me kokëfortësi të pranojë atë që është e dukshme dhe të zbatojë UNCLOS”.
Ai u shpreh se shkelja nga Turqia e rregullave të së Drejtës Ndërkombëtare të Detit përbën një burim tensioni dhe destabiliteti.
“Kërcënimi për të përdorur forcën nëse Greqia ushtron të drejtën e saj për të zgjeruar ujërat e saj territoriale në 12 milje detare; promovimi i teorisë së “Atdheut Blu”; dhe memorandumi i paligjshëm turko-libian, janë elementë të sjelljes së paligjshme të Turqisë”.
