I konsideruar si zoti meksikan i drogës, Rafael Caro Quintero në listën e më të kërkuarve në SHBA është arrestuar në shtetin perëndimor të Sinaloa, thotë marina meksikane.
Quintero akuzohej për rrëmbimin, torturimin dhe vrasjen e një agjenti të njësisë anti-drogë në SHBA në vitin 1985.
Sipas marinës amerikane, Quintero u kap i fshehur mes shkurreve pas ndihmës së një qeni të stërvitur posaçërisht për aksione të tilla, i quajtur Max, shkruan BBC.
SHBA tha se do të kërkonte ekstradimin e menjëhershëm të Quintero. “Nuk ka vend për t’u fshehur për këdo që rrëmben, torturon dhe vret organet e zbatimit të ligjit amerikan.
Ne u jemi thellësisht mirënjohës autoriteteve meksikane për kapjen dhe arrestimin e Rafael Caro Quintero”, tha Prokurorja e Përgjithshme e SHBA Merrick Garland.
Ndërkohë, këshilltari i lartë i Shtëpisë së Bardhë për Amerikën Latine, Juan Gonzalez, shkroi në një postim në Tëitter: “Kjo është një arritje e madhe”.
Quintero ishte një nga tre anëtarët themelues të Kartelit të fuqishëm të Guadalajara. Ai kaloi 28 vjet në burg për vrasjen e ish-agjentit të Administratës Amerikane (DEA), Enrique Camarena.
Vrasja tensionoi marrëdhënie SHBA-Meksikë në atë kohë dhe më vonë u shfaq në serialin Netflix Narcos: Mexico.
Në vitin 2013, një gjykatë në Meksikë shkurtoi dënimin 40-vjeçar të Quintero dhe e liroi atë. Vendimi u rrëzua më vonë nga gjykata supreme e vendit, por Quintero tashmë ishte larguar duke ikur nga sytë e autoriteteve.
Zyrtarët amerikanë thanë se ai u kthye shpejt në trafikun e drogës dhe Uashingtoni më pas ofroi 20 milion dollarë për çdo informacion që çonte në kapjen e tij.
Arrestimi i Quintero është simbolikisht i rëndësishëm edhe pse ai nuk konsiderohet më një figurë kryesore në trafikun ndërkombëtar të drogës.
