Pasuri e paluajtshme me vlerë rreth 2 milionë euro i janë sekuestruar bashkëshortes së Admir Muratajt, i cili u vra gjatë grabitjes në aeroportin e Rinasit.
Nëpërmjet një njoftimi, Policia bën me dije se bashkëshortes së Muratajt, 47-vjeçares me inicialet A. A. (M)., banuese në Tiranë, i janë sekuestruar 1 apartament dhe 2 garazhe, në rrugën “Mihal Grameno”, Tiranë, 1 apartament në Sarandë dhe një sipërfaqe toke (pemëtore), në Mjull Bathore.
Sipas Policisë, nga veprimet hetimore dyshohet se pasuritë e sekuestruara e kanë burimin nga veprimtaritë kriminale të kryera nga Murataj, i cili mbeti i vrarë gjatë grabitjes në Rinas, në vitin 2019.
Ngjarja ndodhi më 9 prill të 2019 ku u grabitën 4.6 mln euro në barkun e avionit në Aeroportin e Rinasit. Gjatë ndjekës së policisë, u vra Admir Murataj, i cili u konsiderua nga Prokuroria si “koka” e planifikimit të grabitjes.
Për ngjarjen policia vuri në pranga 7 persona, teksa dy vëllezërit nga Elbasani Klement dhe Eldi Çala, u arrestuan në vitin 2020 pas 3 vitesh kërkim.
Njoftimi i plotë i policisë:
Finalizohet operacioni policor i koduar “Relative”.
Sekuestrohen pasuri të paluajtshme, me vlerë rreth 2 milionë euro, që dyshohet se e kanë burimin nga veprimtaritë kriminale.
Në kuadër të procedimit penal për evidentimin dhe sekuestrimin e pasurive që rrjedhin nga veprimtaria kriminale, referuar nga Sektori për Hetimin e Krimeve Ekonomike dhe Financiare, nën drejtimin e Prokurorisë pranë Gjykatës së Shkallës së Parë Tiranë, u zhvillua operacioni policor i koduar “Relative”.
Në zbatim të këtij procedimi, u bë ekzekutimi i vendimit të Prokurorisë pranë Gjykatës së Shkallës së Parë, për vendosjen e sekuestros preventive ndaj pasurive të paluajtshme në ngarkim të shtetases A. A. (M)., 47 vjeçe, banuese në Tiranë. Në zbatim të këtij vendimi, u bë sekuestrimi i pasurive të paluajtshme, vlera e të cilave arrin rreth 2 milionë euro, konkretisht:
- 1 apartament dhe 2 garazhe, në rrugën “Mihal Grameno”, Tiranë, 1 apartament në Sarandë dhe një sipërfaqe toke (pemëtore), në Mjull Bathore.
Nga veprimet hetimore dyshohet se pasuritë e sekuestruara e kanë burimin nga veprimtaritë kriminale të kryera nga bashkëshorti i shtetases A. A.(M.), shtetasi A. M., i cili ka mbetur i vrarë gjatë grabitjes së një shume të konsiderueshme parash, në Rinas, në vitin 2019.
Nën drejtimin e Prokurorisë po vijon puna për të zbuluar pasuri të tjera që kjo shtetase ose familjarët e saj mund t’i kenë regjistruar në emër të personave të tjerë”, thuhet në njoftim.
/rtsh.al/
