Mario Balotelli nuk u thirr për ndeshjen e zhvilluar pasditen e sotme mes Adana Demirspor dhe Girensuspur, e fituar nga skuadra e “Super Marios” me rezultatin 3-2.
Mospërfshirja e italianit në listën e skuadrës vjen për arsye të merkatos, me Balotellin që prej kohës flitet se do të transferohet në Zvicër.
Megjithatë vlen të theksohet se në Turqi në orët e fundit po raportohet se: “Balotelli është gati të kthehet në Brescia”.
SuperSport shkruan se arsyeja e shpërndarjes së këtij lajmi i atribuohet profilit të “Super Marios” në “Twitter”, në të cilin shkruhet: “Sulmuesi i Italisë dhe Brescias”.
Duhet thënë se kjo adresë ka rreth një vit që ka qenë jo aktive dhe ende nuk dihet nëse kjo e dhënë është vendosur nga vetë futbollisti, apo nëse profili është hakeruar.
Balotelli, pra, mbetet një emër i nxehtë në merkato, por ende nuk dihet nëse vërtetë bëhet fjalë për një rikthim të bujshëm në Brescia-n e tij.
